कात्तिक पूर्णिमाको पूर्वसँध्यामा साधुलाई भण्डारा

न्यूज आज

जनकपुरधाम । नेपाल भारत खुला सीमा संवाद समितिले कात्तिक पूर्णिमाको पूर्व सँध्यामा बिहीबार धनुषाको सबैला नगरपालिकास्थित कमला किनारमा दुई देशका साधुसन्तलाई भण्डारा आयोजना गरेको छ ।

‘नेपाल भारत मैत्रीका सनातन सुत्रः साधु सन्तके संग’ नाराको साथ आयोजित भण्डारामा संवाद समितिका पदाधिकारीहरुसँगै कात्तिक पूर्णिमाको अवसरमा कमला स्नान गर्न आएका साधुसन्तहरुबीच धार्मिक तथा सांस्कृतिक संवाद गरिएको हो ।

भण्डारामा करिब साढे दुई सयको संख्यामा साधु सन्तहरु सहभागी थिए ।

संवाद समितिका मधेश प्रदेश सहसंयोजक दीपक यादवको नेतृत्वमा आयोजित भण्डारा कार्यक्रमलाई सम्बोधन गर्दै केन्द्रीय संयोजक राजिव झाले कात्तिक पूर्णिमा र दुई देशबीचको परम्परागत सम्बन्धबारे चर्चा गरेका थिए ।

‘कात्तिक पूर्णिमा हिन्दु धर्मावलम्बीले मान्ने पवित्र पर्व हो । धार्मिक अनुष्ठान, पवित्र स्नान र विशेष प्रकारको पूजापाठन गरिने कात्तिक पूर्णिमालाई ‘देव दिवाली’ पनि भनिन्छ । कमला नदी नेपाली र भारतीय दुवै देशबासीका लागि साझा पवित्र नदी हो, जसलाई सबैले पुज्दै आएका छन्’ झाले भने ।

कात्तिक पूर्णिमाको अवसरमा हुने सामुहिक पवित्र स्नानको माध्यमले दुई देशबीचको धार्मिक सांस्कृतिक सम्बन्ध अझ बढी प्रगाढ हुने विश्वास उनले व्यक्त गरे ।

Facebook Comments Box