दशैं (सस्ता) बजारमा तीन करोडको कारोबार
जनकपुरधाम । दशैंको अवसरमा जनकपुरधामस्थित गोपाल धर्मशाला परिसरमा आयोजित सस्ता बजारमा यस वर्ष कम्तीमा तीन करोड रुपैयाँ बराबरको खरिद बिक्री भएको अनुमान गरिएको छ ।
दैनिक उपभोग्य वस्तु बिक्री वितरण हुने सस्ता बजार जनकपुर–दशैं मेलाको मुख्य आकर्षण हो । यो मेलामा अनेक प्रकारका सामान उपलब्ध भएपनि मुख्यतया साबुन, सर्फ, अगरबत्ती, चियापत्ती, चाउचाउ, भुजिया, प्लाष्टिकका भाडा वर्तन, जुताचप्पल र लत्ताकपडा किन्ने ग्राहकको घुइँचो लाग्छ ।
मेलामा आउने अधिकांस मानिसले सस्ता बजारबाट साबुन, सर्फ र अगरबत्ती किनेर फर्किने गरेको आयोजक जनकपुरधाम उद्योग वाणिज्य संघका कोषाध्यक्ष परमेश्वर साह ‘आशा’ को भनाई छ । उनले सस्ता बजारमा यस वर्ष कम्तीमा तीन करोड रुपैयाँको कारोबार भएको दावी गरे ।
घटस्थापनाको दिनदेखि दशमीसम्म यो बजार सञ्चालन गरिएपनि मुख्य आकर्षण भने पञ्चमीदेखि अष्ठमीसम्म रहने गरेको संघकी महिला उपाध्यक्ष रिंकु शाहले जानकारी दिइन् ।
जनकपुरधामका लागि दशैं मेलाको आकर्षण सस्ता बजार र सस्ता बजारको आकर्षण घरेलु उपयोगका सामान रहेको उल्लेख गर्दै शाहले भनिन्, ‘मन्दिरबाट प्रसादी लिएर फर्किए जस्तै सस्ता बजारमा आउनेहरु कम्तीमा साबुन वा अगरबत्ती वा दुवै सामान किनेरै फर्किने गर्छन् ।’
