बारामा क्याम्पस प्रमुखको हत्या

कलैया, बारा । बाराको कलैयामा अज्ञात समूहले गोली हानेर एक क्याम्पस प्रमुखको हत्या गरेको छ । कलैयास्थित रामराजा बहुमुखी क्याम्पसका प्रमुख हरिभुषण कुशवाहाको हत्या गरिएको हो ।

शुक्रबार साँझ अज्ञात समूहले प्रहार गरेको गोली लागेर गम्भिर घाइते भएका कुशवाहालाई उपचारका लागि वीरगंजस्थित बयोधा अस्पतालमा भर्ना गरिएको थियो । त्यहाँ उपचारकै क्रममा उनको मृत्यु भएको प्रहरीले जनाएको छ ।

क्याम्पस प्रमुख कुशवाहालाई बारा जिल्लाको आदर्श कोतवाल गाउँपालिका –३, बतरा भन्ने स्थानमा अज्ञात समूहले गोली प्रहार गरेको जिल्ला प्रहरी प्रमुख एसपी दीपक भारतीले जानकारी दिए । घटनामा संलग्न आशंकामा दुई जनालाई तत्काल नियन्त्रणमा लिइएको उनले जनाएका छन् ।