महोत्तरीमा एक युवकमाथि गोली प्रहार

काठमाडौं । महोत्तरीमा एक युवकमाथि गोली प्रहार भएको छ।

महोत्तरीको गौशाला नगरपालिका–११ बस्ने ३० वर्षीय मुरारी भनिने विनय कुमार महतोमाथि मरहा खोलामा सोमबार साँझ ६ बजे गोली प्रहार भएको हो।

लुटपाटको उद्देश्यले महतोमाथि गोली प्रहार भएको आशंका प्रहरीले गरेको छ। लुटेरा समूहले महतोले लगाएको सुनको सिक्री र ब्रास्लेट लुटेको महोत्तरीका प्रहरी प्रवक्ता डीएसपी सन्तुलाल जयसवालले बताए।

डीएसपी जयसवालका अनुसार कम्मरमा गोली लागेर घाइते भएका उनलाई उपचारको लागि जनकपुर लगिएको छ।

गौशाला बजार जाँदै गर्दा मोटरसाइकलमा आएका दुई जनाको समूहले उनीमाथि गोली प्रहार गरेको हो।

घटनास्थलमा दुईवटा गोली फेला परेको छ। गोली प्रहार गर्नेको प्रहरीले खोजी गरिरहेको छ ।